Канон святой блаженной Ксении Петербургской

Блаженная Ксения Петербургская Минея, 24 Января, Канон Глас 8 Песнь 1 Ирмос: Во́ду проше́д я́ко су́шу, и еги́петскаго зла́ избежа́в изра́ильтянин вопия́ше: Изба́вителю и Бо́гу на́шему пои́м. Припев: Свята́я блаже́нная ма́ти Ксе́ние, моли́ Бо́га о на́с. Водо́ю креще́ния омы́вшися, перворо́днаго греха́ изба́вилась еси́, ма́ти Ксе́ние, и на́ша сердца́ слеза́ми покая́ния очи́сти, просвеще́ние подаю́щи почита́ющым святу́ю па́мять твою́. Припев: Свята́я блаже́нная ма́ти Ксе́ние, моли́ Бо́га о на́с. В воде́ креще́ния зми́я лука́ва потопи́вшая, житие́м твои́м страда́льческим вра́жию си́лу умертви́ла еси́, блаже́нная, от нея́же и на́м изба́витися Спа́са умоли́. Сла́ва Отцу́ и Сы́ну и Свято́му Ду́ху. Во́ду живу́ю неистощи́мых даро́в подаде́ тебе́ Христо́с, блаже́нная ма́ти, Его́же нищету́ во́льно возлюби́ла еси́. И ны́не и при́сно и во ве́ки веко́в. Ами́нь. Богородичен: Во́ды покая́ния пода́ждь ми́, Пречи́стая, и, очи́стивши мя́ от нечистоты́ грехо́вныя, чи́ста предста́ви, Богороди́тельнице, Сы́ну Твоему́ и Бо́гу. Песнь 3 Ирмос: Небе́снаго кру́га Верхотво́рче, Го́споди, и Це́ркве Зижди́телю, ты́ мене́ утверди́ в любви́ Твое́й, жела́ний кра́ю, ве́рных утвержде́ние, Еди́не Человеколю́бче. Припев: Свята́я блаже́нная ма́ти Ксе́ние, моли́ Бо́га о на́с. Небе́снаго кру́га Зижди́телю все́ житие́ свое́ отда́вши, возлюби́ла еси́ до конца́, сподо́би и на́с моли́твами твои́ми, блаже́нная, люби́ти Го́спода до конца́ дни́й на́ших. Припев: Свята́я блаже́нная ма́ти Ксе́ние, моли́ Бо́га о на́с. Небе́сныя жи́зни жела́я, в житии́ твое́м вся́ земна́я пренебрегла́ еси́, сподо́би и на́с, ма́ти Ксе́ние, моли́твами твои́ми Небе́сныя жи́зни дости́гнути. Сла́ва Отцу́ и Сы́ну и Свято́му Ду́ху. Небе́снаго черто́га жела́ющи, стра́нническое житие́ прешла́ еси́, и ны́не со все́ми святы́ми в Небе́сных черто́зех лику́еши. И ны́не и при́сно и во ве́ки веко́в. Ами́нь. Богородичен: Небе́снаго Творца́, Богоро́дице всепе́тая, ро́ждши, Небе́с простра́ннейшая яви́лася еси́. На́с от простра́ннаго пути́ поги́бельнаго укло́ньше, на Небе́сный пу́ть наста́ви, мо́лимся. Седален, глас 5 Я́ко стра́нница во гра́де свята́го Петра́ яви́лася еси́, благоволе́нием Бо́жиим укрепля́ема, ма́ти прему́драя, Боже́ственных даро́в и чуде́с удосто́ившаяся. Те́мже, иму́ще дерзнове́ние ко Христу́ Бо́гу, ми́р испроси́ душа́м на́шым и ве́лию ми́лость. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Ма́ти Пречи́стая, гра́де Бо́жий,/ изба́ви лю́ди Твоя́ от бед/ и по́мощь пода́ждь проти́витися враго́м го́рдым, да вопие́м Ти:/ ра́дуйся, Благослове́нная. Песнь 4 Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́. Припев: Свята́я блаже́нная ма́ти Ксе́ние, моли́ Бо́га о на́с. Услы́шавши, Ксе́ние, я́ко Небеса́ пове́дают сла́ву Бо́жию, отве́ргла еси́ суету́ мирску́ю и в по́двизе поста́ и лише́ния на земли́ Бо́га сла́вити возжеле́ла еси́, Его́же сла́вити и на́с сподо́би. Припев: Свята́я блаже́нная ма́ти Ксе́ние, моли́ Бо́га о на́с. Услы́шавши и уразуме́вши дела́ Госпо́дня, просла́вила еси́ Его́ Божество́, наде́ждою и любо́вию к Нему́ украси́вши ду́шу твою́, по́двигами благоче́стия просвети́лася еси́, блаже́нная, Бо́жиею си́лою укрепля́емая. Сла́ва Отцу́ и Сы́ну и Свято́му Ду́ху. Услы́шавши преще́ния вра́жеския и вся́кия ко́зни от ни́х терпя́щи, непоколеби́ма пребыла́ еси́, и на́с непоколеби́мых в доброде́телех утверди́. И ны́не и при́сно и во ве́ки веко́в. Ами́нь. Богородичен: Услы́ши, Пречи́стая Влады́чице, моле́ния на́ша, и изба́ви на́с от наси́лия вра́жия, и гла́с Христо́в, призыва́ющий благослове́нныя в Ца́рство, услы́шати сподо́би. Песнь 5 Ирмос: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче. Припев: Свята́я блаже́нная ма́ти Ксе́ние, моли́ Бо́га о на́с. Просвеща́хуся ве́рнии лю́дие, зря́ще незло́бие и кро́тость твою́, ма́ти Ксе́ние, помози́ и на́м, блаже́нная, подража́ти твоему́ незло́бию. Припев: Свята́я блаже́нная ма́ти Ксе́ние, моли́ Бо́га о на́с. Просвети́вши стезю́ жи́зни твоея́ све́том Богоразу́мия, Христа́ Го́спода вседу́шне возлюби́ла еси́, сподо́би и ны́, блаже́нная Ксе́ние, в се́м бы́ти тебе́ подража́тели. Сла́ва Отцу́ и Сы́ну и Свято́му Ду́ху. Просвети́ на́с, о ма́ти Ксе́ние, наде́ждою и любо́вию ко Го́споду, ны́не бо зря́щи Христа́ лице́м к лицу́, све́та неизрече́ннаго наслажда́ешися, Тому́ за ны́ моли́ся. И ны́не и при́сно и во ве́ки веко́в. Ами́нь. Богородичен: Просвети́ла еси́ омраче́нное естество́, Богоро́дице, Све́т И́стинный ро́ждши, те́мже и на́с све́том просвети́вши, от мра́чных вра́г свободи́. Песнь 6 Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися и молю́ся, я́ко Ио́на: от тли́, Бо́же, возведи́ мя. Припев: Свята́я блаже́нная ма́ти Ксе́ние, моли́ Бо́га о на́с. Моли́тву, я́ко исто́чник приснотеку́щий, ны́не излива́еши, неду́жныя исцеля́ющи, кре́пость и си́лу стра́ждущым подаю́щи, сподо́би и на́с моли́твами твои́ми изба́витися от вся́ких лю́тых. Припев: Свята́я блаже́нная ма́ти Ксе́ние, моли́ Бо́га о на́с. Моли́твою небе́сною и по кончи́не твое́й от неду́г свобожда́еши, цели́тельнице безме́здная, досто́йно хвали́ма еси́ на земли́, моли́ся о душа́х на́ших. Сла́ва Отцу́ и Сы́ну и Свято́му Ду́ху. Моли́тву на́шу приими́, ма́ти Ксе́ние, да в честны́й хра́м тво́й прии́дем со тща́нием, и неду́гов душе́вных и страсте́й теле́сных исцеле́ние ско́ро прии́мем. И ны́не и при́сно и во ве́ки веко́в. Ами́нь. Богородичен: Моли́твою Твое́ю Всемо́щною, Пречи́стая, изба́ви на́с от вра́г ви́димых и неви́димых, от грехо́в и вся́кия му́ки, я́ко ро́ждшая Человеколю́бца Бо́га. Кондак, глас 3 Дне́сь све́тло лику́ет гра́д свята́го Петра́, я́ко мно́жество скорбя́щих обрета́ют утеше́ние, на твоя́ моли́твы наде́ющеся, Ксе́ние всеблаже́нная, ты́ бо еси́ гра́ду сему́ похвало́ и утвержде́ние. Икос Ка́ко возмогу́, гре́шный а́з, скве́рный душе́ю и те́лом, пове́дати е́же во пло́ти равноа́нгельное житие́ твое́ и пресла́вная чудеса́? А́ще у́бо мно́зи прему́дрии не дерза́ют испове́дати мно́гаго твоего́ терпе́ния и смире́ния и те́плыя ко Христу́ любве́, но оба́че наде́яся на твое́ заступле́ние, о блаже́нная, вопию́ ти: Ра́дуйся, я́ко везде́ призыва́ющих тя́ ско́ро предваря́еши, ра́дуйся, я́ко мно́жество скорбя́щих обрета́ют тобо́ю утеше́ние, ра́дуйся, свята́я блаже́нная Ксе́ниа, гра́ду сему́ похвало́ и утвержде́ние. Песнь 7 Ирмос: О́троцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки. Припев: Свята́я блаже́нная ма́ти Ксе́ние, моли́ Бо́га о на́с. О́троки евре́йския А́нгел от огня́ неопа́льны сохрани́ и тебе́, Ксе́ние, в стра́нничестем житии́ укрепи́, пою́щу: благослове́н еси́, Го́споди Бо́же, во ве́ки. Припев: Свята́я блаже́нная ма́ти Ксе́ние, моли́ Бо́га о на́с. Де́тем ева́нгельски подража́ла еси́ в житии́ твое́м, стезю́ те́сную проше́дши в незло́бии, те́мже и на́с на по́двиг доброде́тели сия́ укрепи́, пою́щих: благослове́н еси́, Го́споди Бо́же, во ве́ки. Сла́ва Отцу́ и Сы́ну и Свято́му Ду́ху. Отроко́м в пещи́ халде́йстей подража́ющи, Ксе́ние, воспева́ла еси́ Христа́, да́вшаго ти́ кре́пость, те́мже и мы́, чту́ще тя́, блаже́нная, со дерзнове́нием зове́м: Благослове́н еси́, Го́споди Бо́же, во ве́ки. И ны́не и при́сно и во ве́ки веко́в. Ами́нь. Богородичен: Отрокови́це Де́во, простри́ на на́с ми́лость Сы́на Твоего́, да кроме́шныя тьмы́ изба́вимся мольба́ми Твои́ми, пою́ще: благослове́н еси́, Го́споди Бо́же, во ве́ки. Песнь 8 Ирмос: Победи́тели мучи́теля и пла́мене благода́тию Твое́ю бы́вше, за́поведем Твои́м зело́ прилежа́ще, о́троцы вопия́ху: благослови́те вся́ дела́ Госпо́дня Го́спода. Припев: Свята́я блаже́нная ма́ти Ксе́ние, моли́ Бо́га о на́с. Победи́тельница страсте́й яви́лася еси́, Ксе́ние, лю́тая искуше́ния вра́жия побежда́ющи и непреста́нно пою́щи: благослови́те вся́ дела́ Госпо́дня Го́спода. Припев: Свята́я блаже́нная ма́ти Ксе́ние, моли́ Бо́га о на́с. Побежда́ющи вся́кия стра́сти грехо́вныя, ты́, блаже́нная, я́ко све́тла звезда́ яви́лася еси́, приво́диши бо же́ны, па́дшия во грехи́, во е́же целому́дренно жи́ти и в покая́нии воспева́ти: благослови́те вся́ дела́ Госпо́дня Го́спода. Сла́ва Отцу́ и Сы́ну и Свято́му Ду́ху. Победи́тельница греха́ яви́лася еси́, блаже́нная ма́ти, благода́ть Вы́шняго иму́щи. Те́мже Небе́сная дости́гла еси́, иде́же ны́не со А́нгелы пое́ши: Благослови́те вся́ дела́ Госпо́дня Го́спода. И ны́не и при́сно и во ве́ки веко́в. Ами́нь. Богородичен: Побе́де во бра́нех духо́вных ве́рным посо́бствуеши, Пресвята́я Де́во, те́мже и лю́дем гра́да на́шего по́мощь Твою́ низпосли́, да Тя́ вы́ну пое́м: Благослови́те вся́ дела́ Госпо́дня Го́спода. Песнь 9 Ирмос: Вои́стинну Богоро́дицу Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще. Припев: Свята́я блаже́нная ма́ти Ксе́ние, моли́ Бо́га о на́с. Вои́стинну ра́зум Христо́в име́ла еси́, Ксе́ние, смире́ние, кро́тость, ве́ру несумне́нну, наде́жду и любо́вь, я́же к Бо́гу, и на́с сподо́би, да с тобо́ю Христа́ при́сно велича́ем. Припев: Свята́я блаже́нная ма́ти Ксе́ние, моли́ Бо́га о на́с. Вои́стинну на тебе́, Ксе́ние блаже́нная, испо́лнися Христо́во прорече́ние: претерпе́вый до конца́, то́й спасе́н бу́дет, ны́не бо со все́ми спасе́нными Христа́ при́сно велича́еши. Сла́ва Отцу́ и Сы́ну и Свято́му Ду́ху. Вои́стинну никто́же, притека́яй к тебе́, блаже́нная ма́ти, то́щь благода́ти Бо́жия отхо́дит, ея́же и на́с испо́лни, да тя́ велича́ем. И ны́не и при́сно и во ве́ки веко́в. Ами́нь. Богородичен: Вои́стинну Богоро́дицу Тя́, Де́во и Ма́ти Сло́ва, Хода́таицу су́щую на́м, Со́лнце Пра́вды возсия́вшую, ве́рнии, единому́дренно пе́сньми велича́ем. Светилен Я́коже со́лнце светоно́сно, возсия́ ны́не, блаже́нная ма́ти, па́мять твоя́, вся́ ве́рныя веселя́щи, и́же моли́твенно взыва́ют ти́: моли́ся приле́жно спасти́ся на́м. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Держа́вным Твои́м покро́вом, Пречи́стая,/ нас, рабо́в Твои́х, от наве́тов вра́жиих сохраня́й всегда́ невреди́мых,/ Тя бо еди́ну стяжа́хом наде́жду и утвержде́ние.