Канон Пресвятой Богородице пред иконой «Себежской», называемой «Умиление»

Икона Богородицы Умиление Себежская (Опочецкая) Минея, 14 Марта, Кано́н Глас 6 Песнь 1 Ирмос: Волно́ю морско́ю/ Скры́вшаго дре́вле гони́теля мучи́теля –/ под земле́ю скры́вша спасе́нных о́троцы,/ но мы, я́ко отрокови́цы,/ Го́сподеви пои́м,/ сла́вно бо просла́вися. Припев: Пресвята́я Богоро́дице, спаси́ на́с. Прииди́те, ве́рных благочести́вая мно́жества,/ духо́вно лик совоку́пльше,/ Пречи́стую Ма́терь Сло́ва Боже́ственными пе́сньми воспои́м,/ зря́ще Те́плую Засту́пницу,/ от Пречи́стаго о́браза Ея́ преужа́сное зна́мение показу́ющую. Припев: Пресвята́я Богоро́дице, спаси́ на́с. Я́коже ле́ствицу высо́кую, зрим Тя, Де́во Всенепоро́чная,/ е́юже к Небе́сней высоте́ восхо́дим,/ и, Тя Предста́тельницу и утвержде́ние непобеди́мое стяжа́вше, Пречи́стая,/ наве́т и сете́й вра́жиих избавля́емся,/ да яви́мся и спасе́мся, ве́рою к Тебе́ притека́ющии. Сла́ва Отцу́ и Сы́ну и Свято́му Ду́ху. В рождестве́ Сы́на Твоего́ тли не прие́мши,/ от тле́ния всех нас изба́ви и печа́ли,/ просвеща́ющи ма́терним Свои́м дерзнове́нием, Богора́дованная. И ны́не и при́сно и во ве́ки веко́в. Ами́нь. Наде́жду иму́ще Тя, Богороди́тельнице, и несумне́нну ве́ру,/ гра́да сего́ наро́ди Тебе́, я́ко забра́ло, гра́ду поло́жше,/ Де́во Неискусобра́чная. Песнь 3 Ирмос: Тобо́ю, Христе́, Небеса́ утвержда́ема вся,/ Сло́во Бо́жие и Си́ла,/ испове́дуют сла́ву неизрече́нну/ и вседе́тельныя руки́ Твое́й сотворе́ние,/ не́сть бо пресвя́т, ра́зве Тебе́, Го́споди. Припев: Пресвята́я Богоро́дице, спаси́ на́с. Умилосе́рдися на ста́до Свое́, Пречи́стая,/ и смире́ние гра́ду Твоему́ да́руй,/ сопроти́вных че́люсти сокруши́/ и тех до конца́ не́мощны покажи́. Припев: Пресвята́я Богоро́дице, спаси́ на́с. О́бщаго Па́стыря и Влады́ку поро́ждши Христа́, Де́во Неискусобра́чная,/ Тому́ помоли́ся, настоя́щаго гне́ва изба́витися нам,/ и́стиннаго обстоя́ния, Влады́чице. Сла́ва Отцу́ и Сы́ну и Свято́му Ду́ху. Ми́лостива еси́, Влады́чице, Ми́лостиваго ро́ждши Спа́са,/ ви́ждь озлобле́ние и воздыха́ние люде́й Свои́х,/ ускори́, Пречи́стая, уще́дрити ны. И ны́не и при́сно и во ве́ки веко́в. Ами́нь. Пою́т Тя, Богоро́дице, А́нгельстии чи́ни/ и пра́зднуют патриа́рхи со святи́тели,/ с ни́ми же тогда́ и Боголюби́вии наро́ди теку́ще во святу́ю Твою́ Це́рковь,/ ви́деша Тя, Цари́це, за ны, гре́шныя, моля́щуюся к Сы́ну Своему́,/ поми́ловати град Твой и лю́ди, в нем живу́щия/ от Твоего́ о́браза преди́вным зна́мением. Седален, глас 8 Ю́же дре́вле лик проро́ческий пропове́да –/ две́рь Небе́сную и неопали́мую купину́,/ све́щник многосве́тлый, злату́ю кади́льницу,/ ру́чку и жезл,/ пресла́вно дне́сь и ди́вно зна́мение показа́,/ те́мже благода́рственное пе́ние возсыла́ем Ти, раби́ Твои́, Богоро́дице,/ моли́ Христа́ Бо́га на́шим согреше́нием оставле́ние дарова́ти,/ Тебе́ бо наде́жду и́мамы, раби́ Твои́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Ю́же дре́вле лик проро́ческий пропове́да –/ две́рь Небе́сную и неопали́мую купину́,/ све́щник многосве́тлый, злату́ю кади́льницу,/ ру́чку и жезл,/ пресла́вно дне́сь и ди́вно зна́мение показа́,/ те́мже благода́рственное пе́ние возсыла́ем Ти, раби́ Твои́, Богоро́дице,/ моли́ Христа́ Бо́га на́шим согреше́нием оставле́ние дарова́ти,/ Тебе́ бо наде́жду и́мамы, раби́ Твои́. Песнь 4 Ирмос: Удиви́ся Твой ра́зум от Мене́,/ услы́шавшу пресла́вная веле́ния смотре́ния Твоего́,/ укрепи́ся же возлюбле́нием Твоего́ схожде́ния,/ Ты бо мое́й нищеты́ не отве́рглся еси́. Припев: Пресвята́я Богоро́дице, спаси́ на́с. Почита́ющия Тя гра́ждане, Пречи́стая, и по до́лгу сла́вящия/ огражда́й от безбо́жных, Чи́стая, иноплеме́нник,/ Ты бо тем еси́, Пречи́стая, бога́тство неотъе́млемо, покро́в же и держа́ва. Припев: Пресвята́я Богоро́дице, спаси́ на́с. Не мо́жет язы́к и сло́во челове́ческое похвали́ти Тя досто́йно,/ от Тебе́ бо без се́мене Жизнода́вец Бог воплоти́тися, Пречи́стая, благоизво́ли. Сла́ва Отцу́ и Сы́ну и Свято́му Ду́ху. При́зри, Пречи́стая, спасти́ся рабо́м Твои́м, пою́щим Тя,/ и изба́ви от сопроти́вных и наше́дшаго гне́ва, Богороди́тельнице. И ны́не и при́сно и во ве́ки веко́в. Ами́нь. Бога́тный дар и неотъе́млемо сокро́вище дарова́ла еси́ гра́ду Твоему́,/ о́браз Твой, Пречи́стая и Ма́ти Сло́ва,/ и сего́ по́мощию проти́вных низлага́ем. Песнь 5 Ирмос: Сою́зом любве́/ связу́еми, апо́столи,/ влады́чествующему все́ми себе́ Христу́ возло́жше,/ красны́ но́ги очища́ху,/ благовеству́юще всем мир. Припев: Пресвята́я Богоро́дице, спаси́ на́с. Те́плая Засту́пнице к Тебе́ притека́ющим и ненаде́ющимся наде́ждо,/ ви́ждь озлобле́ние люде́й Твои́х/ и пода́ждь Свою́ по́мощь, Пречи́стая. Припев: Пресвята́я Богоро́дице, спаси́ на́с. И́же О́гнь ро́ждши Боже́ственный, Де́во,/ проти́вных, Пречи́стая, моли́твою Твое́ю – огне́м – попали́,/ я́ко су́щи Зижди́теля умоля́ющи, Всепе́тая. Сла́ва Отцу́ и Сы́ну и Свято́му Ду́ху. Вели́кий преднапису́ет во проро́цех Моисе́й/ Тя ковче́г, и трапе́зу, и све́щник, и ру́чку,/ обра́зне явля́я воплоще́ние е́же от Тебе́ Вы́шняго, Ма́ти Де́во. И ны́не и при́сно и во ве́ки веко́в. Ами́нь. Ты бога́тство неистощи́мое/ исцеле́нием исто́чник еси́ ве́рою притека́ющим к хра́му Твоему́,/ иде́же пребыва́ет о́браз Твой, Влады́чице. Песнь 6 Ирмос: Ят бы́сть,/ но не удержа́н в пе́рсех ки́товых Ио́на:/ Твой бо о́браз нося́,/ Страда́вшаго и погребе́нию да́вшагося,/ я́ко от черто́га, от зве́ря изы́де ./ Приглаша́ше же кустоди́и:/ храня́щии су́етная и ло́жная,/ ми́лость сию́ оста́вили есте́. Припев: Пресвята́я Богоро́дице, спаси́ на́с. Изба́ви язы́ческаго наше́ствия град Твой, Препе́тая,/ и не преда́ждь до конца́ поги́бнути насле́дию Твоему́, Пречи́стая,/ но си́лою Ро́ждшагося из Тебе́, Влады́чице,/ проти́вных низложи́. Сла́ва Отцу́ и Сы́ну и Свято́му Ду́ху. Мно́го согреши́вших к Тебе́, Го́споди, не пре́зри,/ но приими́ мольбу́ Ма́тере Твое́й о нас, Ще́дре,/ да не хва́лятся сопроти́внии, – где е́сть Бог их? – глаго́люще,/ но да разуме́ют вси, я́ко Ты, Изба́вителю, с на́ми еси́. И ны́не и при́сно и во ве́ки веко́в. Ами́нь. Честну́ю ико́ну Твою́ ра́достно се́рдцем и душе́ю облобыза́ем,/ веселя́щеся и те́плою ве́рою прикаса́ющеся,/ исцеле́ние почерпа́ем неоску́дно. Кондак, глас 4 Притеце́м, лю́дие, бога́тии и убо́зии,/ сири́и и вдови́цы, ста́рии и ю́нии,/ в ти́хое приста́нище,/ под покро́в цельбоно́снаго исто́чника Богома́тере./ Сле́зы бо, я́ко ре́ки, источа́ет/ из обою́ о́ку чудотво́рнаго о́браза Се́бежския/ о находя́щем гне́ве за на́ша зла́я согреше́ния/ и укрепля́ет град, его́же возлюби́ла еси́, на сопроти́вныя,/ утвержда́ет ве́ру правосла́вных христиа́н/ и избавля́ет от вся́каго зла/ моли́твами Свои́ми. Икос Разреши́ тьму́ мои́х согреше́ний,/ ю́же во уме́ мое́м лежа́щую,/ и Твои́м мя све́том просвети́, Де́во,/ я́ко да возмогу́ Тебе́ похвалу́ принести́,/ Ю́же Оте́ц восхвали́ и Дух Святы́й осени́,/ Сын же и Сло́во Бо́жие в Ню́же всели́ся нетле́нно,/ от Пречи́стую Твое́ю боку́ произы́де и с челове́ки поживе́,/ те́мже мы, гре́шнии и недосто́йнии раби́ Твои́,/ дне́сь соверша́юще свяще́нное торжество́ –/ зна́мение, бы́вшее от честны́я ико́ны Твоея́,/ в не́мже преди́вное чу́до показа́ла еси́,/ и, Твоему́ чудеси́ уди́вльшеся и Твои́х бога́тых даро́в испо́лньшеся,/ вме́сто благово́нных арома́т, ели́ко возмо́жно нам, земны́м,/ похва́льная пе́ния прино́сим Ти, глаго́люще:/ ра́дуйся, ра́досте А́нгелом и челове́ком;/ ра́дуйся, покро́ве, и утвержде́ние, и наде́ждо гра́ду Твоему́;/ ра́дуйся, проти́вных си́лою Твое́ю низлага́ющая;/ ра́дуйся, Разу́мнаго Со́лнца Ма́ти, ве́рных просвеща́ющая, неве́рных же помрача́ющая./ Ра́дуйся, христиа́ном похвало́. Песнь 7 Ирмос: Неизрече́нное чу́до:/ в пещи́ Изба́вивый преподо́бныя о́троки из пла́мене/ во Гро́бе мертв, бездыха́нен полага́ется,/ во спасе́ние нас, пою́щих:/ Изба́вителю Бо́же,/ благослове́н еси́. Припев: Пресвята́я Богоро́дице, спаси́ на́с. Вои́стинну сокро́вище че́стно гра́ду Твоему́, ико́на Твоя́, дарова́ся, Пречи́стая,/ ю́же са́ми зря́ще, о чудеси́ удивля́емся, Сы́ну Твоему́ вопию́ще:/ благослове́н Бог оте́ц на́ших. Припев: Пресвята́я Богоро́дице, спаси́ на́с. Во храм Боголе́пнаго Преображе́ния, Влады́чице, притека́юще, лю́дие,/ ру́це простира́юще, на моли́тву дви́жем Тя:/ ви́ждь озлобле́ние на́ше и пода́ждь Твою́ по́мощь, Богоро́дице. Сла́ва Отцу́ и Сы́ну и Свято́му Ду́ху. Светоно́сная благода́ть, исцеле́ние гра́ду Твоему́ даде́ся, о́браз Твой, Пречи́стая,/ его́же любе́зно облобыза́юще, веселя́щеся, вопие́м:/ благослове́н Бог оте́ц на́ших. И ны́не и при́сно и во ве́ки веко́в. Ами́нь. Свеща́ Боже́ственнаго сия́ния и Незаходи́маго Све́та яви́ся,/ све́щник, светосия́ющ и мир ве́сь озаря́ющ заре́ю чи́стаго де́вства,/ Тя пою́щия спаса́еши, Благослове́нная,/ Я́же Бо́га пло́тию ро́ждшая. Песнь 8 Ирмос: Ужасни́ся, боя́йся, Не́бо,/ и да подви́жатся основа́ния земли́:/ се бо в мертвеце́х вменя́ется в Вы́шних Живы́й/ и во Гроб мал странноприе́млется./ Его́же, о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки. Припев: Пресвята́я Богоро́дице, спаси́ на́с. Собезнача́льное Сло́во Отцу́ Де́ва породи́ Пречи́стая нетле́нно,/ Того́ моли́, Богороди́тельнице,/ от сопроти́вных напа́стей спасти́ся гра́ду Твоему́ и в нем лю́дем, пою́щим:/ Го́спода воспева́йте, дела́,/ и превозноси́те Его́ во ве́ки. Припев: Пресвята́я Богоро́дице, спаси́ на́с. Еди́на су́щи Блага́я,/ Преблага́го Сло́ва умоли́ приле́жно/ настоя́щаго гне́ва гра́ду Твоему́ изба́витися,/ да несумне́нною ве́рою Сы́ну Твоему́ зове́м, пою́ще:/ де́ти, благослови́те, свяще́нницы, воспо́йте,/ лю́дие, превозноси́те Его́ во ве́ки. Сла́ва Отцу́ и Сы́ну и Свято́му Ду́ху. Сопроти́вных разжже́ния и пламеннови́дныя стре́лы, испуща́емии на нас, угаси́, Влады́чице,/ я́ко да Тя пое́м и превозно́сим, Чи́стая, во ве́ки. И ны́не и при́сно и во ве́ки веко́в. Ами́нь. Я́ко нетле́нное зерца́ло, име́я во гра́де Твою́ чудотво́рную ико́ну, Пречи́стая,/ сопротивля́ющихся низлага́ем и Сы́ну Твоему́ вопие́м:/ благослови́те, вся дела́ Госпо́дня, Го́спода/ по́йте и превозноси́те Его́ во ве́ки. Песнь 9 Ирмос: Стра́нствия Влады́чная/ и Безсме́ртныя Трапе́зы/ на Го́рнем ме́сте высо́кими умы́,/ ве́рнии, прииди́те, наслади́мся,/ возше́дша Сло́ва,/ от Сло́ва научи́вшеся, Его́же велича́ем. Припев: Пресвята́я Богоро́дице, спаси́ на́с. О́ком милосе́рдным свы́ше при́зри на град и в нем лю́ди Твоя́, Пречи́стая,/ ины́я бо по́мощи не и́мамы, то́кмо Тя, Всенепоро́чную,/ те́мже вси я́ко Ма́терь Бо́жию велича́ем. Припев: Пресвята́я Богоро́дице, спаси́ на́с. Раби́ Твои́, вопие́м Ти, Пречи́стая Ма́ти Бо́жия:/ обы́чныя ми́лости Твоя́ на град и лю́ди ми́лостивно покажи́/ и сопроти́вных обстоя́ний нас изми́,/ да Тя непреста́нно велича́ем. Сла́ва Отцу́ и Сы́ну и Свято́му Ду́ху. Мы́сли очи́стивше и ум,/ празднолю́бнаго гра́да Опо́чки собо́ры/ со свяще́нным чино́м и всех ве́рных благочести́вое мно́жество,/ восхвали́те Ма́терь Сло́ва,/ я́ко от Той о́браза бы́сть преди́вное зна́мение,/ ему́же со стра́хом кла́няющеся, Тя велича́ем. И ны́не и при́сно и во ве́ки веко́в. Ами́нь. Я́коже Боже́ственною све́тлостию озаря́ему/ зрим дне́сь, Пречи́стая, ико́ну Твою́ честну́ю,/ е́йже кла́няющеся, Тя велича́ем. Светилен Возжеле́в, Пречи́стая, Твое́я добро́ты, Иису́с в Тя всели́ся,/ и Засту́пницу Тя Твоему́ гра́ду Сло́во Бо́жие дарова́,/ его́же сохраня́й заступле́нием Твои́м при́сно,/ я́ко да Тя ублажа́ем, Пренепоро́чная Отрокови́це.