- Главная страница
- Молитвы
- Канон преподобному Кириллу, игумену Челмогорскому и Каргопольскому, чудотворцу
Канон преподобному Кириллу, игумену Челмогорскому и Каргопольскому, чудотворцу
Текст молитвы
Глас 4
Песнь 1
Ирмос: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зными Моисе́овыма рука́ма/ Амали́кову си́лу в пусты́ни победи́л есть.
Припев: Преподо́бне о́тче Кири́лле, моли́ Бо́га о на́с.
Лю́тыми страстьми́ жития́ побежда́ем есмь окая́нный аз/ и сего́ ра́ди молю́ Тя, Христе́ Бо́же, от сих изба́витися,/ я́ко да досто́йно возмогу́ восхвали́ти Твоего́ уго́дника, Кири́лла преподо́бнаго.
Припев: Преподо́бне о́тче Кири́лле, моли́ Бо́га о на́с.
Лю́тых мя смуще́ний свободи́, о́тче,/ да, наставля́ем твои́ми моли́твами,/ све́тло воспою́ твое́ торжество́, Кири́лле преподо́бне.
Сла́ва Отцу́ и Сы́ну и Свято́му Ду́ху.
Разуме́х, преподо́бне, аз свое́ недосто́инство/ и со стра́хом косну́хся к твоему́ хвале́нию,/ но ты, блаже́нне, приими́ с ве́рою тебе́ прино́симое хвале́ние, о́тче Кири́лле.
И ны́не и при́сно и во ве́ки веко́в. Ами́нь.
Богородичен: Пречи́стая Богоро́дице,/ Ты ми бу́ди кре́пкая По́мощнице, рабу́ Твоему́,/ и изба́ви ду́шу мою́ от се́ти диа́воли,/ и спаси́ мя, лю́те потопля́ема волна́ми грехо́вными,/ моли́твами Твоего́ уго́дника, Кири́лла.
Песнь 3
Ирмос: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.
Припев: Преподо́бне о́тче Кири́лле, моли́ Бо́га о на́с.
От неразу́мия страсте́й мои́х возведи́ мя, свя́те, и да́руй ми свет у́мный,/ да возмогу́, недосто́йный, от гру́баго ума́ моего́/ худое сие́ плете́ние принести́ к похвале́нию чуде́с пресла́внаго твоего́ торже́ства́.
Припев: Преподо́бне о́тче Кири́лле, моли́ Бо́га о на́с.
Ве́ру в души́ неоску́дну имел еси́, преподо́бне,/ и да́нный ти тала́нт трудолю́бно возделал еси́,/ да всем нам по́даси дар, разли́чно боля́щим,/ душе́вных страсте́й и теле́сных боле́зней исцеле́ние,/ творя́щим святу́ю па́мять твою́.
Сла́ва Отцу́ и Сы́ну и Свято́му Ду́ху.
Процве́л еси́, я́ко кедр, в пусты́не непроходи́мей, о́тче преподо́бне Кири́лле,/ приноша́я плоды́ ду́ха, во мно́зе терпе́нии те́ло свое́ удруча́я,/ от бесо́в и злых челове́к прие́мля озло́бление,/ и сих ра́ди прия́т ве́чное насле́дие.
И ны́не и при́сно и во ве́ки веко́в. Ами́нь.
Богородичен: Аз, Де́во Свята́я Богоро́дице, наде́жду име́я на Тя, спасу́ся,/ потреби́, Влады́чице, враги́ души́ мое́й/ и наста́ви мя на путь жи́зни, да, спа́сся, вопию́ Ти:/ ра́дуйся, По́мощнице ми́ру и наде́ждо ве́рным;/ ра́дуйся, Де́во, христиа́ном похвало́.
Седален, глас 8
Всели́ся, преподо́бне, в пусты́ню/ и поживе́ в ней во а́лчбе мно́зе и в про́чих злострада́ниих,/ не дая́ покоя те́лу своему́ и зе́млю де́лая свои́ма рука́ма,/ за е́же получи́ти бу́дущий покой,/ но получи́л еси́ оную ра́дость лю́бящим Бо́га,/ ты же помина́й чад свои́х и не забу́ди, я́ко обеща́ся, да вси вопие́м ти:/ о́тче Кири́лле преподо́бне, моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Прибе́жище су́щим в напа́стех лю́тых,/ премене́ние к Бо́гу, согреша́ющим спасе́ние,/ Пречи́стая Влады́чице, спаси́ нас от вся́каго обстоя́ния, и озлобле́ния челове́ческаго,/ и стра́шнаго муче́ния, и страсте́й безче́стия,/ несумне́нною ве́рою Тя при́сно призыва́ющих,/ Де́во Всепе́тая, моли́ Христа́ Бо́га грехо́в оставле́ние дарова́ти/ благоче́стно сла́вящим Тя.
Песнь 4
Ирмос: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.
Припев: Преподо́бне о́тче Кири́лле, моли́ Бо́га о на́с.
Боже́ственною Пресвята́го Ду́ха блиста́яся благода́тию, светоно́сне о́тче Кири́лле,/ честно́е творя́щих твое́ успе́ние/ све́тлою твое́ю моли́твою страсте́й на́ших мглу очи́сти.
Припев: Преподо́бне о́тче Кири́лле, моли́ Бо́га о на́с.
Я́коже со́лнце на земли́,/ доброде́телей просвеще́ннем просия́л еси́ в пусты́ни,/ всех ду́ши, преподо́бне, духо́вною благода́тию просвеща́я.
Сла́ва Отцу́ и Сы́ну и Свято́му Ду́ху.
Победи́в плотска́го наве́та мудрова́ния,/ Ду́ха Свята́го благода́ть прия́л еси́ отгоня́ти неду́ги и боля́щия греха́ми цели́ти ду́ши,/ о́тче Кири́лле досточу́дне.
И ны́не и при́сно и во ве́ки веко́в. Ами́нь.
Богородичен: Неискусобра́чно родила́ еси́, Де́во,/ и по Рождестве́ я́вльшися де́вствующи па́ки,/ те́мже гла́сы немо́лчными, е́же ра́дуйся, Влады́чице, ве́рою несу́мне́нною Тебе́ вопие́м.
Песнь 5
Ирмос: Ты, Го́споди, мой Свет,/ в ми́р прише́л еси́,/ Свет Святый, обраща́яй из мра́чна неве́дения/ ве́рою воспева́ющия Тя.
Припев: Преподо́бне о́тче Кири́лле, моли́ Бо́га о на́с.
Боже́ственною любо́вию, о́тче Кири́лле, распаля́ем,/ не убоя́лся еси́ долготы́ пу́тныя, в непроходи́мую пусты́ню дойде́,/ ниже́ та́мо нечести́вых челове́к супротивле́ния и о изгна́нии от ме́ста того́,/ но с любо́вию вся претерпе́л еси́.
Припев: Преподо́бне о́тче Кири́лле, моли́ Бо́га о на́с.
О, чудо! ка́ко от еди́наго тобо́ю призыва́ния/ иногда́ злотво́рцы разбо́йницы, прише́дше на тя, восхоте́ша сме́рти преда́ти тя,/ ви́девши чу́до пресла́вно от о́браза Богома́тере, посрами́шася.
Сла́ва Отцу́ и Сы́ну и Свято́му Ду́ху.
Све́ту вели́ку я́ко неве́стник ны́не предстои́ши, о́тче Кири́лле, блаже́нне,/ помина́й изря́дное свое́ достоя́ние,/ е́же мно́гими труды́, о́тче, стяжа́л еси́.
И ны́не и при́сно и во ве́ки веко́в. Ами́нь.
Богородичен: Тя ору́жие непобеди́мое на враги́ предлага́ем,/ Тя, Де́во, утвержде́ние и наде́жду на́шему спасе́нию, Богоневе́сто, стяжа́хом.
Песнь 6
Ирмос: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.
Припев: Преподо́бне о́тче Кири́лле, моли́ Бо́га о на́с.
Ра́лом Богому́дрых слове́с твои́х, о́тче преподо́бне,/ олядене́вшая чу́дска язы́ка люде́й се́рдца́ возде́ловая,/ и Боже́ственное се́мя покая́ния в них всея́в,/ плод зре́лый своему́ Влады́це, блаже́нне, прине́сл еси́.
Припев: Преподо́бне о́тче Кири́лле, моли́ Бо́га о на́с.
Быстри́нами медото́чных слове́с твои́х/ чу́дскаго язы́ка диа́вольскую пре́лесть и и́дольское служе́ние, преподо́бне Кири́лле, угаси́л еси́,/ Боже́ственными уче́ниями ве́рно се́рдца́ их утверди́л еси́.
Сла́ва Отцу́ и Сы́ну и Свято́му Ду́ху.
И́же к Бо́гу жела́нием страсте́й успи́л еси́ воста́ния/ и всено́щным стоя́нием дарова́ния восприя́л еси́ виде́ти су́щая та́мо неизрече́нныя добро́ты, Кири́лле чу́дне.
И ны́не и при́сно и во ве́ки веко́в. Ами́нь.
Богородичен: О, чу́до, и́же всех чуде́с нове́йши,/ ка́ко Де́вая во утро́бе и́же вся́ческая Содержа́щаго/ сло́вом неискусому́жно прие́мши и нете́сно вмести́вши.
Кондак, глас 8
От ю́ности, преподо́бне, вся оста́вль жите́йская, кра́сная же и ле́потная,/ и в пусты́ню всели́вся, усе́рдно после́довал еси́ Зва́вшему тебе́, преблаже́нне,/ в труде́х же и посте́х, о́тче, те́ло свое́ изнури́л еси́,/ отоню́дуже тя па́стыря Свои́м овца́м до́бре устроя́ет всебога́тый Госпо́дь,/ Кири́лле чудоде́йственниче, моли́ Христа́ Бо́га/ о приходя́щих с ве́рою и прося́щих свои́х согреше́ний оставле́ние дарова́ти,/ чту́щим любо́вию святу́ю па́мять твою́.
Икос
Уясни́ ми язы́к и укрепи́ мой ум, Христе́ Бо́же, моли́твами Пречи́стыя Твоея́ Ма́тере,/ пода́ждь ми благ язы́к глаго́лати на похвалу́ и моле́ние Твоего́ уго́дника, и свещу́ умиле́ния,/ ю́же, воздрема́вся, угаси́х нераде́нием,/ но моли́твами преподо́бнаго Кири́лла возжги́,/ и не отлучи́ мене, Христе́, многосогре́шша, ли́ка преподо́бных Твои́х,/ все у́бо упова́ние к Тебе́ возлага́ю,/ Ты бо и град наш сохраня́еши и святу́ю оби́тель моли́твами преподо́бнаго,/ прося́щим согреше́ний оставле́ние дарова́ти/ чту́щим любо́вию святу́ю па́мять его́.
Песнь 7
Ирмос: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.
Припев: Преподо́бне о́тче Кири́лле, моли́ Бо́га о на́с.
Поще́нием огради́вся от ю́ности, преподо́бне,/ тем те́ло свое украша́я и бла́гопокорну ду́шу соде́ловая,/ к сему́ же и стра́сти побежда́я, без стуже́ния от сих пребы́л еси́, поя́:/ благослове́н Бог оте́ц на́ших.
Припев: Преподо́бне о́тче Кири́лле, моли́ Бо́га о на́с.
Нищету́ самово́льную Христа́ ра́ди стяжа́в,/ и от всех жите́йских безыме́нен был еси́, доброде́тельми обогати́вся,/ и мно́гих к ре́вности научи́ пе́ти:/ благослове́н Бог оте́ц на́ших.
Сла́ва Отцу́ и Сы́ну и Свято́му Ду́ху.
Позна́л еси́, о́тче преблаже́нне, кова́рствия лука́ваго де́мона,/ хотя́щаго ке́ллию твою́ во е́зеро воврещи́,/ и сего́ до конца́ низложи́л еси́, и нас на моли́тву воздви́гни днесь,/ да ве́рою лику́ем, па́мять твою́ пою́ще:/ благослове́н Бог оте́ц на́ших.
И ны́не и при́сно и во ве́ки веко́в. Ами́нь.
Богородичен: Ми́лостива мне Суди́ю и Сы́на Своего́, Богоро́дице Де́во,/ и Изба́вителя лю́тых мои́х согреше́ний/ Твои́ми моли́твами бы́ти в День Суда́, Ма́ти, сотвори́,/ к Тебе́ бо Еди́ной упова́ние возлага́ю.
Песнь 8
Ирмос: Ру́це распросте́р, Дани́ил/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.
Припев: Преподо́бне о́тче Кири́лле, моли́ Бо́га о на́с.
Смире́ние стяжа́в попремно́гу и чистоту́ теле́сную, я́коже подоба́ет святы́м,/ и и́стинное же целому́дрие вельми́ удержа́л еси́/ и ско́рбных нанесе́ние, ра́дуяся прие́мля, поя́:/ благослови́те, вся дела́ Госпо́дня, Го́спода.
Припев: Преподо́бне о́тче Кири́лле, моли́ Бо́га о на́с.
Страх Бо́жий стяжа́в в себе́ и сим показа́в чу́вства своя́,/ е́же не преступи́ти свои́х уста́в, ни повреди́тися от сих у́мному де́ланию,/ Бо́гови угоди́в, во смире́нии поя́:/ благослови́те, вся дела́ Госпо́дня, Го́спода.
Сла́ва Отцу́ и Сы́ну и Свято́му Ду́ху.
Со зверьми́ ди́виими в пусты́не, преподо́бне, живы́й,/ приходя́ще к тебе́, кро́тцы быва́ху от благода́ти Бо́жия, пребыва́ющия в тебе́,/ но повеле́нию твоему́ повинова́хуся, поя́:/ благослови́те, вся дела́ Госпо́дня, Го́спода.
И ны́не и при́сно и во ве́ки веко́в. Ами́нь.
Богородичен: Ты Еди́на во всех ро́дех, Де́во Пречи́стая Ма́ти, яви́ся Бо́гу,/ Ты Бо́жеству́ бысть пребыва́ние, Всенепоро́чная, не опали́ся Огне́м непристу́пнаго Све́та,/ те́мже Тя вси благослови́м, Мари́е Богоневе́сто.
Песнь 9
Ирмос: Ка́мень нерукосе́чный/ от несеко́мыя горы, Тебе́, Де́во,/ краеуго́льный отсече́ся,/ Христо́с, совокупи́вши разстоя́щаяся естества́./ Тем, веселя́щеся, Тя, Богоро́дице, велича́ем.
Припев: Преподо́бне о́тче Кири́лле, моли́ Бо́га о на́с.
Пребы́вшу ти, о́тче Кири́лле, мно́га ле́та в пусты́не в безмо́лвии, и поще́нии,/ и всех ско́рбных в терпе́нии и попремно́гу Бо́гу угоди́вшу,/ отню́дуже и Он тя прославля́ет, я́ко Своего́ уго́дника.
Припев: Преподо́бне о́тче Кири́лле, моли́ Бо́га о на́с.
Поще́нием насажде́н быв, я́ко дре́во при вода́х, блаже́нне Кири́лле,/ воздержа́ния процве́л еси́ доброде́тельми свои́ми,/ и в ме́ру дости́г во́зраста исполне́ния Христо́ва,/ и духо́внаго соверше́ния получи́л еси́, я́ко же мо́щно челове́ку.
Сла́ва Отцу́ и Сы́ну и Свято́му Ду́ху.
Ты у́бо, преподо́бне о́тче, хотя́ утаи́тися от челове́к и еди́н Еди́ному Бо́гу безмо́лвствовати,/ но не оста́ви Он тебе́ неве́дома бы́ти,/ но всем, тре́бующим спасе́ния, я́ве показа́ тя, житие́ твое́ доброде́тельное,/ на по́льзу хотя́щим стопа́м твои́м после́довати.
И ны́не и при́сно и во ве́ки веко́в. Ами́нь.
Богородичен: И́же все́ми владе́ющи тва́рьми,/ лю́дем Твои́м да́руй побе́ду и одоле́ние на непокори́выя язы́ки,/ да Тя, я́ко Богоро́дицу, велича́ем.
Светилен
По́стнический яви́ся свети́льник, блаже́нне о́тче Кири́лле,/ после́дуя стопа́м преподо́бных Анто́ния и Варлаама,/ отту́ду научи́вся и показа́ся чу́ден свети́льник,/ в се́верных страна́х ны́не предстои́ши во Све́те Святы́я Тро́ицы, ра́дуяся.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Велича́ем Ма́терь Бо́га на́шего, тебе́, преподо́бне, сохра́ньшую,/ ю́же вси ро́ди блажа́т от ны́не и до ве́ка,/ ю́же и мы, гре́шнии, воспева́ем, велича́юще:/ ра́дуйся, Обра́дованная, Госпо́дь с Тобо́ю.
